أفكار جديدة للديكورات باستخدام رفوف الكتب في مكتبة المنزل

رفوف الكتب الملونة يمكن استخدامها كلمسة جميلة في تجديد ديكور البيت، وتوجد طرق كتيرة ومختلفة لاستغلال الكتب في الديكور علشان تعملى لبيتك ستايل خاص يعبر عنك . ونقدم في هذا المقال 10 أفكار مختلفة وسهل تنفيذها تستطيعي استغلالها وتنفيذها

 

1- رف الكتاب على شكل قوس قزح :

 

هذه طريقة لطيفة جدا و مليانة بالالوان المبهجة علشان تستغلى بيها رفوف الكتب ، رتبي الكتب بتاعتك حسب الوانهم وبعد كده رتبي مجموعات الالوان دي بترتيب الوان قوس قزح، ترتيب الكتب على الرفوف على شكل قوس قزح هيعمل شكل مختلف ومبهج فى البيت، علشان تعملى نفس الشكل اللى فى الصورة هتحتاجى كتب كتيرة لكن ممكن تعوضي ده بانك تستخدمى رفوف كتب أصغر، ولو ماعندكيش كتب ملونة ممكن تستخدمى ورق الجلاد الملون فى تلوين اغلفة الكتب بتاعتك علشان تعملى الشكل ده. ممكن كمان تضيفى شوية تفاصيل زي براويز الصور، الشموع او اى ديكورات تانية تحبيها.

 

2- رف الكتاب على شكل شجرة

: كل اللى محتاجاه علشان تنفذى رفوف الكتب على شكل شجرة هو رفوف زجاجية و دهان حائط او ورق حائط 3D على شكل فروع شجر، لو كنتى بتعرفى ترسمى ارسمى شكل الشجرة زى اللى فى الصورة و سيبيه ينشف وبعد كده ثبتى الرفوف الزجاجية على الفروع بنفس الترتيب، ولو مالكيش فى الرسم اشترى ورق حائط  او رسومات جاهزة 3D على شكل فروع شجر والزقيه على الحيطة وبعد كده ثبتى الرفوف الزجاجية بنفس الطريقة. الديزاين ده فريد ومختلف فى شكله وهيضيف لمسة حلوة اوى فى ديكور بيتك.

 

3- رفوف الكتب على شكل خلية نحل :

 

الشكل ده من رفوف الكتب هيبقى مناسب ليكى لو كان عندك كتب كتيرة، اختارى حيطة مناسبة فى البيت ونفذى تصميم رفوف الكتب على شكل خلية النحل، التصميم ده صعب تنفذيه بنفسك، لكن ممكن عند النجار ينفذهولك وبتكلفة مناسبة.

 

4- رف الكتاب المعلق :

 

رف الكتاب المعلق بالشكل ده مختلف وفكرته جديدة جدا وهيدى شكل مميز للديكور فى بيتك، كل اللى هتحتاجيه هو قطعة خشب طويلة بحجم اللى فى الصورة ومشابك وخيوط قوية وعلقى الكتب بتاعتك بشكل جديد!

 

5- رف الكتاب الـ Chaotic :

 

الشكل ده من رفوف الكتب مميز وبيعتبر مودرن، هو تقريبا نفس فكرة رف الكتب على شكل خلية نحل لكن المختلف هنا هو ان الابعاد بين الكتب غير متساوية واحجام المربعات كمان مختلفة ، التصميم ده هيغير شكل الحيطة وهيخليه مختلف وفريد.

 

6- رف الكتاب على شكل بيانو :

 

علشان تعملى التصميم ده محتاجة يبقى عندك بيانو قديم ومركون، استغلى البيانو القديم وحوليه لقطعة ديكور مميزة، رف الكتاب على شكل بيانو هيحول الحيطة عندك لقطعة فنية فريدة

 

7- رفوف للكتاب تحت السلم :

 

لو بيتك دورين وعندك مساحة تحت السلم عايزة تستغليها، حولى المساحة دى لمكان مخصص للقراية واعملى رفوف للكتب تحت السلم. اعملى رفوف خشبية زى اللى فى الصورة فى المساحة الفاضية تحت السلم واستغليها بشكل جديد.و ممكن كمان تلونى الرفوف او ترتبى الكتب حسب الوانها زى ما قولنا فى اول شكل للرفوف.

 

8- رف الكتاب على شكل حرف A :

 

ممكن تصممى رفوف للكتب على شكل حرف A خشبى او اى حرف تانى تفضليه وبأى لون، التصميم ده جديد ومميز و هيخلى الديكور ممتع اكتر، اختارى اول حرف من اسم الشخص المفضل عندك ونفذيه، وممكن كمان تنفذى الشكل ده لترتيب الكتب فى غرف الاطفال.

 

9- رف الكتاب على شكل برواز :

 

استخدمى براويز الصور الخشبية القديمة لترتيب الكتب على الحيطة بالشكل اللى فى الصورة علشان تعملى رفوف بتصميم مختلف و vintage.

 

10- رف كتاب super hero :

 

لو كنتى من محبين الـ super heroes يبقى التصميم ده هو الاختيار الانسب، ممكن تختارى علامة الـ super hero المفضل ليكى زى سوبرمان او باتمان و تنفذي بيه رف الكتب، و الفكرة دى هتبقى حلوة جدا فى غرف الاطفال و هتحببهم فى القراية بشكل كبير، نفذى لاطفالك رفوف الكتب بالتصميم ده علشان تخلى اوضتهم مميزة.

قد يهمك أيضاً:

خطوات تجعلك تحتفظ بمزاج الإجازة حتى بعد العودة إلى المنزل
التصميم الداخلي للبيت يحوي تفاصيل صغيرة يمكن أن تغيير ديكوره