شيماء سيف تخسر 50 كيلو من وزنها وتهاجم ياسمين عز لهذا السبب

حلت الفنانة شيماء سيف ضيفة على برنامج "كلام الناس" الذي تقدمه الإعلامية ياسمين عز، حيث تحدثت عن الرجال ورأيها فيهم وأكثر ما يضايقها منهم، موجهة الهجوم لمقدمة البرنامج بعد دفاعها عن الرجال في كل حلقاتها.وقالت شيماء: "الرجل عمومًا يضايقني، وجوده في الحياة يضايقني، أنتِ جيالي في يوم عندي خناقة، فمش هتاخدي مني حاجة كويسة، الرجل عمومًا، يعطي لنفسه حجمًا أكبر من حجمه، أصل أنا مابعملش غير حاجة واحدة واحنا غير الستات، وبنركز في حاجة واحدة بس واطلبي طلب واحد"، لتقاطعها ياسمين عز: "صدق"، وتجاوبها شيماء: "آه صدق، وعبط، اللي بيقوله ماينفعش، ليه يا حبيبي؟ ليه أنا أبقى مركزة أوي وبعمل 100 ألف حاجة، وأنا أقول لك هات دا وأنت جاي وكلم الراجل أكد عليه، ولا لازم تحصل أي لخبطة".

وأضافت: سيبك إن أنا ممثلة وحد يعرفني، أنا النهاردة ست مصرية جاية أشوف آخرك إيه".

وتابعت: الرجل شخصية محدودة، رحم الله امرأً عرف قدر نفسه، حضرتك محدود، فيجب أن تعيش على هذا المبدأ، لا تعطي لنفسك حجمًا أكبر، بما إن أنا ربنا أعطاني منحة أنني بألف نحلة، وحضرتك بتعمل حاجة واحدة، فتيجي آخر اليوم كتر خيرك يا حبيبتي، مش عايزة غيرها، إنما بنعمل حاجة واحدة وبننفخ أوي، لا أنا عاملة كتير بس ساكتة، فهي دي بقى".

واستكملت شيماء: "من ضمن المشاكل لدى الرجال، وعلى فكرة هي ليست عندي فقط، أنا أتناقش مع صديقاتي، وأجد طبعًا أن كلنا عندنا نفس المشكلة، إن تبقى عندنا خناقة كبيرة أوي، وأنا في قمة انفعالاتي ومشاعري، وبعدها بالضبط بـثلاث ثوانٍ، (إيه يا شوشو هناكل ايه؟)، لا شوشو إيه إحنا في حرب.

وانتقدت تصريحات ياسمين عز الداعمة للرجال على حساب السيدات، قائلة: "أنتِ بتخاطبي مين بكلامك دا يا ياسمين، أنا جاية وعايزة أجيب من الآخر، أنتِ في حالة حب أنا مقدراها، وبتخاطبي حبيبك، معنديش مشكلة، نبعت له الكلام دا فيديوهات على الموبايل، إحنا كستات شايفين كتير، أنا كنت أنوي ألا أتطرق لهذا الأمر حتى تمر الحلقة بسلام، أنا مكبوتة وستات مصر مكبوتين أكتر مني، ارجوكي مرارتنا، المستشفيات لن تكفي فقع المرارة".

واستكملت: "أنتِ عارفة إيه أكتر حلقة لكِ استفزتني، حلقة الفالنتين، كنت هرمي التلفزيون، مش عايزاه يجيب هدية؟ إيه يا ياسمين أنتِ تعرفي ناس تانية؟ إغريقي؟ اشوفه هذا الفرعون اللي بيتقاله كدة.

وتحدثت عن خلافها مع النجمة هنا الزاهد الذي استمر ثماني سنوات، وانتهى بعد لقائهما في حفل زفاف ريم سامي، قالت: "أقسم بالله أنا عارفة أن الناس مش هتصدقني، أنا أبسط وأتفه في الخناقات من ما أنتم متخيلين، والمشكلة كانت مع صاحبتي وكنا رايحين مع بعض عزاء وحصل مشكلة بسيطة أوي وقتها وكل واحدة راحت لوحدها".

وتابعت: "وهي كتبت منشور حسيت إنه في تلقيح عليّ، علشان كده لقحت عليها، أنا نشرت على السوشيال ميديا ولقحت عليها على الملأ، علشان تشوفها هي وأختها، ومؤخرًا اتصالحنا، ومفيش أي مشكلة بيننا.

وأعلنت شيماء عن خضوعها لعملية تكميم معدة بعد تعرضها لأزمة صحية بسبب وزنها الزائد، وقالت: "عملت عملية تكميم معدة، أنا صاحبة مقولة ليه أعمل رجيم وأنا قدامي شوكولاتة ولامكرونة بشاميل، بس لو نفتكر، أنا بردو اللي كنت بطلع أقول أنا الحمدلله صحتي كويسة، لو حصل لصحتي حاجة، إلا صحتي، وحصل، والسنة اللي فاتت رجلي بدون سابق إنذار وركبتي مش قادرة أتنيها".

وتابعت: صحيت من النوم ركبتي لا أستطيع ثنيها، ولا أعرف ماذا أفعل، بطلع سلمة كدة، بصرخ وبحس بوجع فظيع، وكلمت دكتور وقلت له مش عارفة في إيه وكنت بصور، وقال لي لازم تعملي أشعة، وعملت الأشعة وبعتها له، قال لي لازم نعمل تغيير مفصل حالًا، وهنا حسيت أني واحدة تانية، وأنا أكره دخول المستشفيات، وانهرت وجالي اكتئاب، ورحت التصوير وحاولت أخبي".
وأضافت: الفنانة يسرا قالت لي أنتي فيكي حاجة، ووقفت التصوير وحكيت لها، وقالت لي نروح لدكتور تاني، وطمني وقال لي مش محتاجة عملية ولكن إنت شيلتي ركبتك لواحدة عندها حاجة و30 سنة حِمل واحدة كإنها مشيت 80 سنة، ومي كساب كانت بتزن عليا، هي عملتها واللي عملها بعد ما بيخس ويحس إنه خفيف، وبيحب حد بيقول له عشان يحس الإحساس دا، وكانت بتطمني، وقد كانت، شكة دبوس".

واستكملت شيماء سيف: أول ما عملت العملية نزلت 20 كيلو، وبعدها بقى 6 كيلو وحاجات كدة، وإحساس جميل إنك تنزلي من 3 أرقام على الميزان لرقمين، ونزلت 50 كيلو حتى الآن.

قد يهمك أيضــــــــــــــــًا :

شيماء سيف وأحمد فهيم ينضمان لأبطال مسلسل "فراولة"

شيماء سيف تشارك في المسلسل الكويتي "عش الدبابير"