خمس نصائح يسديها تامر حسني لجمهوره لإصلاح النفس

كتب الفنان تامر حسني عبر حسابه الخاص في "فيسبوك" منشوراً قدّم من خلال مجموعة نصائح لجمهوره بالصبر على أنفسهم وتكرار المحاولات لإصلاح النفس.

وقال تامر في منشوره: "يوم جميل على الجميع كالعادة مش بعتبركم محبين فقط لا أنا دايماً بشوفكم ناس من أهلي حتى لو بعضكم معندوش الإحساس دا تجاهي أنا بقى عندي تجاهكم كلكم الإحساس دا، ودا إحساس ربنا زرعه فيا معرفش ليه ومعرفش ليه مزروع فيا بالقوة دي عشان كدا أقسم بالله أي خير بعرفه بحب أنقله ليكم فوراً...".

وأضاف: "كنت بقرأ موضوع مهم أوي بما إني مجنون قراءة وسماع حبيت أكلمكم عنه وهو (مجاهدة النفس)... واثق إننا كلنا بنمر بظروف ومؤثرات وأفكار بتغير حاجات جوانا، في ناس بتغيرها للأفضل وفي ناس للأسوأ وكلامي لكل شخص حاسس من جواه إنه متضايق وعنده خطأ في فكره أو عقيدته وقناعته أو عادة سيئة ومعصية ثابتة مش عارف يتخلص منها أو صفة في شخصيته مش كويسة وفاقد الأمل في تصليحها".

وأردف قائلاً: "عشان يصلحها ويتغير لازم أول حاجة يعترف بيها قدام نفسه وميقاومش ويبرر وجودها لازم يشوفها يبقى:

١- تعترف بيها قدّام نفسك.

٢- تاخد قرار حاسم في بدء الامتناع عنها.

٣- تدرس المقابل ليها في الصالح وتسعى في اتجاهه.

٤- تختار أصحاب صفاتهم بعيدة عن هذه العيوب والعادات المشابهة.

٥- تصبر على نفسك في التغيير، يعني لو أخدت قرار ورجعت فيه مش معناه انك فشلت، لا خد القرار تاني حتى لو فشلت في الإصلاح ١٠٠ مرة عادي، كمّل في إصرارك على التغيير والتطوير وخد كمان مرة القرار أهم حاجة راقب نفسك وشوف مؤشر تحسنك بيزيد ولا ثابت خليك وراه لحد ما يبدأ يعلى هتلاقي نفسك واحدة واحدة انتصرت على نفسك وكسبت التحدي... نهاركم عسل زيكم".

قد يهمك أيضــــــــــــــــًا :

تامر حسني يحيي حفلاً غنائيًا في سلطنة عمان الجمعة

تامر حسني يوجه نصائح حياتية للجمهور