زوج خاين وبتاع بنات وشخص غير سوي اديله فرصة ولا اخلع

انا الصراحة مش هاكتب شكوى ولا بحكي حكايتي الشخصية انا حابب اخد رأيكم كلكم في مشكلة عايشين فيها وبتأثر في حياتنا بشكل ما.. المشكلة عن اختي المتزوجة اختي في اواخر العشرينات وزوجها كمان اكبر منها بسنة… هي اتعرفت على جوزها بحكم انه جارنا وكان صاحب اخواتي وبيتردد حوالينا طول الوقت من وهما صغيرين كان بيقول انه بيحبها وكان عايز يرتبط بيها ويتجوزها من وهو في ثانوي…. فضل يلح وهي مش قابلاه ودخلوا الكلية وبرضه هي مش مرتاحة اوي لحد ما قالت طالما بيحبها وعايزها من زمان توافق وحصلت الخطوبة ومن هنا بدأت المشاكل بين الاهل وان اهلي شايفين انه كل حاجة لازم تمشي حسب الاصول بينما اهله كانوا الاول شايفين انه ممكن تفضل الخطوبة كام سنة عادي…. الخطوبة استمرت تقريبا 3 سنين واكتر وكان في تصرفات بتثبت احيانا انه شخص سيء لكن كان بييجي يعتذر ويعمل نفسه ندمان. حتى قبل الجواز افتعل مشاكل كتير وتسبب ان اهله يتضايقوا من اختي ويشيلوا منها وبسببه العيلتين اشتبكوا مع بعض وبقت العلاقة بينهم سطحية والتعاملات بتكون على مضض….. حصل الجواز وحملت اختي من اول شهر كان دايما يسيبها تيجي تقعد عندنا فترة ويفضل في بيتهم لوحده وهي اتفاجئ من اسلوب حياته انه انسان مش نضيف وحياته مقرفة وحتى قذر في نفسه بس عادي قالت كل الرجالة معفنين ومش بيحبوا النظام ولا النضافة ولازم حد يشيل وراهم مع ان ابونا مش كده ولا من النوع اللي بيزبل ويستنا غيره ينضف وراه…… …..اكتشفت عصبيته معاها وانه اناني واهم حاجة عنده نفسه وبس …بعد ما حملت كانت معظم الوقت بتقعد عندنا في البيت وهو عادي مع نفسه ….بعدها اكتشفت انه يعرف بنات وانه بيخرج معاهم ….اتخانقت معاه واقنعها انه الموضوع عادي وخلاص ها ينهيه بس استمر في القرف اللي هو فيه بعدين اكتشفت وشافت صور انه كان بيجيب ستات البيت وينام معاهم وحتى بيلبسوا لبسها وتلاقي احيانا ملابس و قمصان النوم بتاعتها تلاقي فيها ريحة عرق وقرف…. وهي اتحملت وسكتت …المهم نزلت الشغل بعد ما شافت منه البخل وبيحاسبها على كل قرش مع انه شغال يصرف على البنات والاشكال المقرفة اللي يعرفها …..بعد فترة اشتغل والشغل كان واخد كل وقته وهي اتلهت في بيتها وطفلها وحملت تاني ….في اخر شهور الحمل رجعت ريما لعادتها القديمة …..رجع يهتم بنفسه جدا وهو خارج مع انه اساسا مش نضيف في نفسه يعني وبيقعد في البيت بعفانته عادي …..طول الوقت بيطنشها هي وطفلها وخارج مع ان شغله مش كل يوم ومش بيحتاج ينزل علطول …..كان بيبات بره وقت كتير …..ومعظم اليوم اصلا بره البيت وفجأة اختي تعرف انه كان ماشي مع بنت وبينهم علاقة غير شرعية وكمان بعد كده اتجوزها ولما جالها اخطار اعلام الزوجة الاولى بالجواز كان عدا اسبوع على جوازهم وطلع كان مقرر يطلق البنت اللي اتجوزها لانه شاكك في سلوكها- على اساس هو سلوكه سليم- واختي في نفس الوقت على وش ولادة وفي الشهر التاسع ومش عارفة هل تكمل معاه عشان العيال ولا تسيبه مع ان هي غالبا خايفة يلوي دراعها بالاطفال لو قررت تسيبه وهو لما عيلته اتكلمت معاه وهي لما اتكلمت معاه كمان كان مش ندمان وشكله مكمل في النجاسة اللي هو فيها – ديل ال*** عمره ما ينعدل فعلا- فانا حابب اعرف رأيكم ايه واختي تعمل ايه وتتصرف ازاي

طالما انها عرفت انه شخص خاين وله علاقات مع بنات ويخونها ياستمرار فلازم تخبر اهلها بالحقيقة عشان يضعوا حدا له ولتصرفاته المحرمة والغير اخلاقية السكوت عليه يخليه يتمادى في الخيانة ولاانصحها بطلب الطلاق لان عندها اطفال صغيرين حرام لاذنب لهم في مايحصل بينها وبين زوجها واختك لازم تغيير من نفسها للافضل تهتم بنفسها وبزوجها اكثر من اي وقت مضى وماتخليش جوزها يبص لحد ثاني غيرها الست الذكية تعرف ازاي تسيطر على الراجل بشي من الحب والمشاعر والانوثة والاغراء والدلع وعمره مايتركها او يفكر في احد غيرها ربنا يصلح حالها ويهدي زوجها ويقلع عن المحرمات والمعاصي ويؤفقهم ويسعدهم طوال حياتهم الزوجية